تصحيح للمعلومات المغلوطة اللي منشورة بقالها يومين فيما يخص بيع قناة السويس والصندوق الاستثماري الجديد.

معلومة لازم تعرفها الأول علشان الصورة تبقى واضحة ومن خلالها هتفهم إيه اللي بيحصل.

طبقاً للقانون فإن 85% من إيرادات قناة السويس كل عام بيتم توريدها للخزانة العامة للدولة و 15% من الإيرادات تابعة للهيئة بيتم منها صرف المرتبات ومصاريف التشغيل والصيانة.. إلخ

الصندوق اللي تم إنشاؤه حديثاً دا هيتحط فيه الباقي من الـ 15% الخاصين بالهيئة ويتم الاستثمار فيه وتنمية المبلغ دا.

مثال:-

إيرادات هيئة قناة السويس من أول السنة لحد النهارده 7.9 مليار دولار، يعني قول على آخر الشهر هتكون 8 مليار دولار، طبقاً للقانون خزانة الدولة هتاخد السنة دي من هيئة قناة السويس 6.8 مليار دولار اللي هما 85% من إجمالي الإيرادات، كدا الهيئة هيتبقى ليها 1.2 مليار دولار، هتشيل الرواتب ومصاريف التشغيل والصيانة والمصاريف الخاصة بالقناة وخدماتها ومشاريعها المحيطة اللي بتصرف عليها قول يا سيدي مثلا هتصرف على كل دا مليار دولار، كدا اتبقى مع الهيئة 200 مليون دولار.

الـ 200 مليون دولار دولا هيتحطوا في الصندوق اللي الكلام بيتم عليه حالياً، الصندوق ليه مسؤولين هيحددوا إيه أفضل استثمار ممكن نعمله بالمبلغ دا علشان يزيد، ممكن بقى يقولك هنعمل مشروع استزراع سمكي جنب القناة والسمك نبيعه ونكسب فيه والمكسب للصندوق لأنه تم بفلوس الصندوق، ممكن يقولك احنا نشتري بالفلوس دي عقارات ونبيعها كمان سنة، ممكن يقولك هنشتري بيها أراضي ونتاجر، ممكن يقولك انا هشتري أسهم في شركة فودافون، لأن دا اسمه صندوق استثماري فالقائمين عليه يستثمروا في أي مجال طبقاً لرؤيتهم.

نيجي السنة الجاية الفائض من ميزانية الهيئة يتحط في الصندوق وقيمته تكبر مع كل سنة ومع كل استثمار.

وجود صندوق زي دا مهم جداً في الحالات الطارئة وعلى رأي المثل زي ما بنقول شايلين قرشين على جنب للزنقة.