كلمتين للستات
بقلم / مروه السيد
إحنا بنشوف اليومين دول ظاهرة منتشرة قوى إن الواحدة تبقى متجوزة ومعاها عيال وكمان متجوزة عن حب وتلاقيها بتخون جوزها مع واحد ضحك عليها بكلمتين حب . بصي بقى كل واحدة تقرى الكلمتين دول كويس عشان بعد كدة منرجعش نعيط لأن دى مصيبة كبيرة وطبعاً السبب النت ومواقع التواصل الزفت اللى الناس بتستخدمها غلط . إبن عمك / إبن خالك / زميل دراسة / جارنا من زمان / إبن الجن الأزرق بعتلك مساء الخير صباح الخير إزيك عاملة إيه مش باينة ليه طمنيني عنك وحشتيني هى بتبدأ كده وتنتهى بموت ودمار وخراب بيوت .. فتحتى بابك للشيطان و هيخرب بيتك بعدها . مالك حزينه ليه حاسس من كلامك إنك متضايقة طب إحكيلى فضفضيلى جوزك ضايقك أنت لو مراتى مستحيل أسيبك لحظة ?. هوب إتعلقتى به وبقيتوا أصحاب ميعديش يوم بالكتير غير لما تتكلمى معاه وبتحكى معاه على إنه صديق مع إنك من جواكى بتحبيه وعوزاه يجوزك . و هو يقولك أنا عايز أجوزك برضو بس لولا إنك ست متجوزة بعد تتطور العلاقة الى لقاء ثم …..؟؟!! ومن هنا تحصلى على لقب ست متزوجة وخاينة . وخاينة فى كل الأديان و الأعراف والتقاليد و العادات والمجتمعات ومهما بتاخدي احتياطياتك هتتكشفي لاتقولى بقى مشاعرى ولحظة شيطان و لا غلطة أنتى اللى فتحتى للشيطان بابك على مصراعيه . أول ماتلاقى واحد بعتلك كده من غير حوارات ونقاشات بلوك علطول ، واللى يزعل يزعل ويتفلق حتى لوقريبك دي أصول ومبادئ أحسن ماتندمى فى الآخر وتبكي بدل الدموع دم . يابنت الأصول حافظى على بيتك مهما كانت حالتك يا بنتي متدخليش أى رجل غريب حياتك . أنت على ذمة رجل خليكى فى حلالك فى حضن جوزك ، بيوت كتير خربت بسبب العلاقات دي جوزك اللي طالع عينه في شغله دا عشانك أنت مش حد تاني . و يارب ماحد يزعل من كلامي خليكي فاكرة كلامي كويس البنت أو الست هى اللى بتفتح بابها مش الرجل لأن هو لو اتنطط مش هيعرف يفتح بابها لو هى مش عايزة تفتح .
اترك تعليقاً