يتيم الأم سلام الله على قلبك يا أجمل أم في الملكوت
يتيم الأم سلام الله على قلبك يا أجمل أم في الملكوت
بقلم الشاعرة / فاطمة حكيم
متابعة المستشار الإعلامى والثقافى / سامح الخطيب
العمق نيوز
يتيم الأم
سلام الله على قلبك
يا أجمل أم في الملكوت
فارقتيني .. وسيبتيني
في حضن الموت !
أنا الميت ..
مش إنتي يا روحي
يا سايبة كحول في جروحي
فراقك قل في طموحي ..
وزاد الخوف مع التوهان !
يتيم الأم عاش تعبان
وعاش قلبه حزين جداً
يتيم الأم كان محتاج
لحضن وطبطبة وحنان !
وكان يتمنى لو مرة
تشوفه الأم بدموعه
فتاخده بلهفة في ضلوعها
تخرج قلبه مـ الأحزان !
ولو مع أمه يوم برة
يعود من فسحته فرحان
يتيم الأم عاش مظلوم
يتيم الأم بات يبكي
وسال دمعه في حضن النوم !
يتيم الأم عاش مهموم
لكن غيره سعيد جداً
بأمه وحضنها الدافي !
– فراقك ليا كان كافي
يزود حمل في اكتافي
وحضنك ليا كان شافي
من الأحزان ..
يتيم الأم صار يحلم
بأم تحبه وتربيه
على العشرة ..و عـ الإحسان
وعـ التقوى .. و عـ الإيمان
ترتل معه في القرآن
ما تترك قلبه يوم زعلان
تكونله في مرضه كمادة
تخف حرارته لو تعبان
تحارب لأجله أي ظروف
تطمن قلبه وقت الخوف
تكونله القشة لو غرقان
– بروزت صورتك عـ الحيطان
وكتبت إسمك عـ البيبان
وبقيت بشوفك في المنام
ومازلت بشتاقلك !
أنا قلبي مُستهلَك في دموعه لوداعك !
” تباً لكل عزيز بكاكي أو باعك “
صرت أتمنى يوماتي رجوعك
وأحضن كفك وأمحي دموعك
هللي وايدي يا غالية شموعك
وامحي دموعي بنبض ضلوعك
وهاتي الفرحة من تاني
فراقك ليا بكاني
والضحكة قلبت وجع وصبحت وحداني !
جفت حبور القلم وأنا روحي بتعاني
والقهوة صاحب جدع مفارقش أحزاني
إجمعني ربي بأمي وأحضنها من تاني !