عُمرك سألت نفسك ليه اللون البنفسجى مش موجود فى أىّ علم دولة .. ؟؟

العالم فيه حوالى 196 دولة ومفيش ولا دولة منهم العلم بتاعها فيه لون بنفسجى بالرغم من إنه لون جميل ومحبوب ، ياترى ايه السبب فى كده ..؟

– لحد سنة 1800 كان اللون البنفسجى نادر وغالى جداً لدرجة إنه كان أغلى من الدهب ، وعلى مرّ العصور كان اللون ده دايماً مرتبط بالثراء والقوة ومش بيلبسه غير طبقة معينة من الشعب ، لدرجة إن الملكة إليزابيث حرّمت أى حد من الشعب إنه يلبسه باستثناء أُسرتها المالكة ..

– سبب تميُّز اللون البنفسجى هو إنه كان نادر جداً والصبغة المُستخدمة فى إنتاجه كانت غالية جداً ، الصبغة دى كانت بتيجى من تجّار فى مدينة “صور” الموجودة حالياً فى لبنان ، كانوا بيستخرجوا الصبغة دى من قواقع بحرية صغيرة ومش موجودة فى أى مكان تانى فى العالم غير فى منطقة “صور” دى اللى بتطُّل على البحر المتوسط ، واستخراجها كان صعب جداً وبيحتاج مجهود كبير لدرجة إنهم كانوا بيحتاجوا أكتر من 10000 قوقعة عشان يستخرجوا جرام واحد بس من الصبغة ، وطبعاً مكانش حد يقدر على تكاليف الصبغة دى غير الحُكّام ، عشان كده اللون البنفسجى كان مُرتبط بطبقات حُكام مصر وروما وبلاد فارس ..

– الصبغة حتى كانت غالية على بعض الحكام لدرجة إن الإمبراطور الرومانى السابق “أوريليان” مكانش بيسمح لزوجته إنها تشترى هدوم لونها بنفسجى ، لإن الصبغة كانت بتكلّف 3 أضعاف وزنها دهب يعنى الباوند الواحد من الصبغة بيساوى 3 باوند دهب يعنى ما يُعادل دلوقت 65 ألف دولار!! ، وطبعاً مفيش ولا دولة قدرت تتحمّل إنها تستخدم اللون البنفسجى فى علمها ..

– واللون مبقاش مُـتاح لعامة الشعب إلا من حوالى قرن ونصّ كده ، سنة 1856 الكيميائى “ويليام هنرى بيركين” صاحب ال18 عام كان شغّال فى تصنيع علاج للملاريا وبالصُدفة صنع مُركّب بنفسجى ولاحظ إنه ممكن يستخدمه فى صباغة القُماش باللون البنفسجى ، وأخد براءة اختراع عليه وبدأ بتصنيعه على نطاق واسع وبقى فاحش الثراء بسبب الصُدفة دى ..

– ومن وقتها واللون البنفسجى بقى متاح لكل الناس وتلاشت قيمته وطبعاً أعلام الدول فضلت زىّ ما هىّ متغيرتش لحد التسعينات أما أعلام جديدة اتصمّمت وعدد قليل جداً منهم حوالى 3 دول اللى استخدموا اللون البنفسجى فى علمهم ..