ساعة عصرية
حكاوي بالعامية
الحلقة العاشرة
بقلم : محمد فتحي شعبان
صباح الفل الجو اليومين دول حلو و عموما أنا لا بحب الشتا و لا بحب الصيف ولا الربيع ولا الخريف ، ومتسألوش أزاي عشان أنا نفسي مش عارف ،خلينا في الكلام اللي أنا عايز أقوله ( حافظ مش فاهم ) ، في آية من القرآن الكريم ديما بتتردد في ذهني وهي قوله عز وجل ( الشيطان يعدكم الفقر و يأمركم بالفحشاء والله يعدكم مغفرة منه وفضلا ) سورة البقرة آية ٢٦٨ .
ركز معايا كدة وأقري الآية تاني و تالت ايه اللي وصل لذهنك ايه الصور اللي مرت علي بالك ( الشيطان يعدكم الفقر و يأمركم بالفحشاء ) الشيطان بيوسوس في راسك الايام اللي جاية صعبة ، العيال ايه مصيرهم ،طب الظروف المادية مش حلوة ، الأسعار مولعة نار حنعيش ازاي ، أمسك متديش حد حاجة ما يشتغلوا ، يعني يا اخي هما محتاجين لتبرعاتك في ألف غيرك بيتبرع ، ووساوس كتير جدا اشكال وأنواع مختلفة ، ( و يأمركم بالفحشاء ) البت دي حلوة ، الست دي حلوة ، ايه يعني لما تبص الأولي لك والتانية عليك طول في النظرة الأولي شوية ، ايه يعني لما البس كدة ما كل الستات والبنات بيلبسوا كدة ، وحاجات كتير جدا ، الشيطان مفيش حاجة وراه غير أنه يخوفك ويوسوس ليك ويغويك ، أنت هدفه عايش عشانك انت بس
أنت عدوه الأوحد في الحياة ، وكلنا خايفين من بكرة ، خايفين من اللحظة الجاية ، خايفين من الفقر والمرض وكل حاجة ، قام الشيطان خطيبا في الناس فاتبعوه وتعلقوا به وجري فيهم مجري الدم ،كلنا علي الحال ده إلا من رحم ربي ، كمل الآية ( والله يعدكم مغفرة منه وفضلا ) ، مهما عصيت ربك منتظر منك التوبة والاستغفار عشان يغفر لك ، مهما عملت ربك بيرزقك ومتكفل برزقك ،مهما عملت ربك بيفرح بيك لما ترجع ، ( أنا عند ظن عبدي بي) ، أيوة ركز معايا أنت ايه ظنك بالله ، مصدق الشيطان ولا مصدق ربنا ، مصدق وعد الشيطان ولا مصدق وعد ربنا ، شوف انت بقي مصدق ايه .
ايه ( الشيطان يعدكم الفقر و يأمركم بالفحشاء والله يعدكم مغفرة منه وفضلا ) ( أنا عند ظن عبدي بي )
أيامكم سعادة
