ليه عاوز تتعرف على الخاص يا بغل:

اللى مش قادر أفهمه مش وحاجة غريبة بتحصل من بعض الرجال الغير محترمين تلك الفئة من هؤلاء الرجال اللى بتدخل على الخاص عند أى سيدة قبلت صداقته على موقع التواصل الإجتماعي ويقولها ممكن نتعرف.

طيب يا محترم يا جهبز أنت عاوز تتعرف أزاى وآيه معنى التعرف عندك فهمنا يمكن أحنا جهله ومش فاهمين عبقريتك الفظيعة دى.

يا عم المحترم ما أنت على صفحتها وكل المعلومات عنها وإللى عاوزك تعرفها موجودة على صفحتها وبوستاتها موجودة وفكرها وثقافتها وإللى يغيظك والمصيبة بتبقى عارف أنها متجوزه وعندها أولاد وبتشتغل وكل حاجة ومنزله صورها مع أسرتها وأنت بكل جهل مصمم تتعرف.

طيب قولى بذمتك عاوز تعرف ايه تانى مقاس جزمتها إللى هتضرب بها على وشك ولا مقاس أيدها إللى تنزل تطرقع على قفاك العريض إلا إذا كان غرضك حاجة تانية وأنت فاهمنى طبعا وكلمة ممكن نتعرف دى بداية الحكاية للى فى دماغك القذرة.

يا متخلف منك له الفيس أتعمل لتبادل الآراء والثقافات والمعلومات والتواصل الفكرى الإجتماعى مش علشان حاجة تانية أنت فاهمنى طبعا.

والحاجة التانية دى موجودة فى مواقع تانى وعددها بالهبل وأدخل وأتنيل على عين أهلك زى ما أنت عاوز وأتعرف على ستات زى عينتك لأنها موجودة فى الموقع ده علشان دى شغلتها وعلشان تستغلك يا بغل وتدفع دم قلبك إنما هنا على الفيس ستات محترمة ومش معنى أنها غلطت وقبلت طلب الصداقة بتاعك يعنى بتموت فى دباديبك ولمؤاخدة يعنى أنت مش حسين فهمى ولا احمد عز ولا فلانتينو عصرك علشان تتجنن عليك وحتى دول بيبقوا محترمين ولارج فى معاملتهم مع الستات.

يا محترم لازم تفرق بين ست موجودة علشان التواصل الاجتماعى أو عامله صفحة علشان شغلها أو للتواصل مع أفراد أسرتها إللى فى أماكن بعيدة وبين ستات شغلتها الهوى والقرف إللى بتفكر فيه.

وإللى أعرفه لو مش داخل الخاص علشان شغل أو مشكلة عامة يبقى كلمة نتعرف دى ملهاش غير معنى واحد وهى أنها مجرد لفظ مهذب لمدلول الرغبة الحيوانية إللى عندك وإللى مش عارف تتحكم فيها.

ياريت بقى أرحمونا جتكم القرف ماليتو البلد.

وأرحموا الستات شوية لأنهم زهقوا منكم وأبتدوا ينشروا فضايحكم وبرضوا مفيش فايدة.

والأغرب أن السيدة كاتبه رجاءا ممنوع الخاص وبرضوا أنت بغبائك مش سايبها فى حالها وتدخل الخاص هو أنت البعيد غير ولا مش بتشوف الكلام المكتوب.

وتعالى للمصيبة أغلب الرجالة الرخمه بيبقى متجوز والمصيبة لو مراته دخلت الفيس يمنعها من الصور وقبول الرجالة على صفحتها ويعمل حواليها قلعة ويحبسها وهو داخل على كل الستات إللى على صفحته علشان يتعرف ويعيش الدور

طيب إللى مش راضيه على مراتك محلله على غيرك ليه ولا هو حرام على مراتك وحلال للستات الغريبة.

يا زفت الطين أنت الراجل مش بس شنب ولا مجرد نوع فى بطاقة ولكن الراجل تصرف وأحترام ويخاف على بنات الناس زى ما بيخاف على مراته وبنته وأمه.

بذمتك وانت داخل بتكلمها وعاوز تتعرف عمرك ما فكرت أن ممكن واحد زيك كده أهبل يدخل يتعرف على مراتك أو أمك او بنتك ولا دول هم معصمين من الخطأ.

أهدوا كده وهدوا أعضاكم إللى تعباكم دى أهدوا شوية وكفاية قرف جتكم القرف.

يارب نفهم ونبقى محترمين شوية.

وللحديث بقية مادام هناك فى العمر بقية.