وَلَد وبِنت عايشين حياتهُم بقلم / ممدوح العيسوى
مقضيِّنها واى فاى ونِت
وواحدة سِت
ع الفيس بتتسامر
مع واحدة سِت
وحد تاني
فى سيرة الخلق بيقطَّع
وفى الفارغة وفى المليانة
نازل يلِت
وخُد آراء وهات آراء
وناس تِهزى وكُلُّه هُراء
وواحدة جميلة
بتصَاويرها بِتسوِرنا
وبالبوستات بِتبهِرنا
ودي صفحات
وناس بِتشَيَّر الإشاعات
على شَرَفَك يا سيدنا النِّت
وناس م الفقر بتصدَّق
وكأنُّه لقىَ لقيِّة وما صَدَّق
وناس راكبة سفينة نوح
فاتحين عليها حِساب مفتوح
شلال دُعاء
بِأسرُّاره تملِّي يبوح
فاكر الدُّعاء بسُرعة نِتُّه
لِلسَّما اوام ح يروح
بركاتك وحركاتك
يا سيدنا النِّت
خَلِّيت عقولنا بشطاحاتك
تَملِّي تشِت
ياطول رايحاتك وجيَّاتك
علينا تحُط
جعلت النَّاس
بتتجمع من غير وشوش
ويتسايروا ويتحاكوا
ما يتقابلوش
بَقِتْ عيشة يا مولانا
فاشوش فى فاشوش
كما أسراب طيور شاردة
ملهاش عشوش
وناس عايشة ومتعايشة
وناس مرضَانة ومكبوتة
وناس بتحكي حدوتة
وناس فى النِّت نتيتة
جروب وكأنُّه بارتيتة
بركاتك يا مولانا
بركاتك ياسيدنا النِّت
بقلم / ممدوح العيسوى
مصر
