اعتبرنى حرف ومات…
بقلم الشاعرة / صباح غيث (شاعرة الريف )
متابعة المستشار الإعلامي / سامح الخطيب
اعتبرنى حرف ومات ……
صعب حبيبى أحسك نفسى وإنت
تقتل فى أيامى الأمان بكل غرور
صعب أناجيك حتى فى همسى
وإنت كل يوم بتبني بيننا ألف سور
مش بقولك هاتلى نجمة من السما لكن
بلاش تحكم عليا أعيش بجناح مكسور
بلاش تنهى قصة حب اتحدت
الدنيا والأحزان علشان تشوف النور
محتاجة قلبك يخاف عليا يحسنى
ووقت ضعفى بقوة لحضنه يضمنى
أنا حرة بيك ومعاك وماليش وطن
. غيرك أرجوك بلاش بجفاك تهدنى
أنا عشت عمرى بستناك ويوم
ما قابلتك إحساسي بيك ملكني وهزنى
وعلى قد ماحبيتك واتمنيتك على
قد ماقلبك ظلمنى وداس عليا وذلنى
أنا عايشه حالة من الجمود
متغربة فيها حتى الكلمات
حالة تمرد على إحساس بيك
حالة حنين لماضى عدي وفات
حجبت عن عيونى نور
الأمل وجلدت قلبى بنار السكات
إدفنى أيوه إدفنى فى دفاتر
حياتك واعتبرنى حرف ومات
أيوه اعتبرنى حرف ومات
بقلمي – صباح غيث
