الدكتورة / جيلان قاسم رقعة شطرنج الاتنين 26 ديسمبر 2022 :العمق نيوز

احنا هنكمل في ملف الاقتصاد لفترة .. وهناخد بعض المواضيع الجانبية لكن الاساس هو الاقتصاد في مصر

معركة الشائعات :

طبعا المفروض اني ألغي عقلي … و اصدق ان بوست رجول الفراخ اللي احتل السوشيال ميديا في 4 ساعات و بقا موجود علي اكتر من 5 مليون اكونت فيسبوك و تويتر بالليييييل .. و تاني يوم الضهر لقينا رقاصين الاخوان عاملين فيديوهات عنه و منتشرة في اليوتيوب دي صدفة بحتة

سجلتوه و لميتوا داتا و جبتوا سكرينات كومنتات للمصريين الغلابة و عملتوا مونتاچ و اتنشر امتي

مش محتاجة لحد بتاع سياسة و لا حد بتاع اقتصاد

ده محتاج حد عنده عقل مش اكتر … ياخد التفاصيل و يربطها هيفهم ان ده سكريبت اتعمل و اتجهز و اتوزع

و كالعاااااادة نجح .. كالعاااادة اتزحلقتوا وراهم و شوفوووا الفقر و شوفوا الجوع

هنفضل لإمتي يتلعب بينا الكورة من شوية صيع طيب … هنستخدم عقولنا امتي

و الحقيقة يعني ردود اعلامية مقززة و تفتقر للعنف الدفاعي

ما هو مش الهجوم بس اللي لازم يكون بعنف .. الدفاع كمان

مداخلة لمعرفش مين يقولك اننا بنصدر اطنان للصين و هي تعتبر وجبة فخمة للصينيين … يا عم الصينيين بياكلوا فيران و قطط و كلاب

القول الفصل يا سيدي الفاضل البوست ده هو بوست مدسوس و له اغراض مشبوهة و هي استفزاز الناس و نشر السلبية و احداث حالة من الغضب .. و ان ده غير متوافق مع توجهات الدولة و مجهودات الرئيس في هذا الاتجاه .. و انا بحذر الشعب المصري من هؤلاء المجموعات

و ان احتياطي السلع الاستراتيجية لدينا مقدارها كذا .. و انه تم الافراج الجمركي عن كذا و كذا من الاعلاف .. و ان الريس بنفسه بيتابع مافيا تجار الاعلاف

اييييييييه معندكش خد يكتبلك الكلمتين دول و لا معندش الشجاعة تقول كده

شوفولنا حد وشه مكشوف شوية يرد علي الغجر يا اخواننا .. شوفولنا حد ميكونش طبقة صوته شتوية و ناعمة .. هاتولنا حسام و ابراهيم حسن طيب

اللي بعده

الشير بلا وعي

و الاسم محسوبين علي الجبهة الوطنية … اللي هو قطعتوا و قطعت ايامكم

احنا هنمشي مصطفى مدبولي .. و نرشح مكانه 3

محمود محي الدين .. طارق عامر .. كامل الوزير

عارفين لو البنت بنت اخويا اللي لسه بتتعلم تكتب هي اللي بتقترح … مش هتقترح الاسماء دي

اول سؤال انتوا مين اللي هتمشوا و تجيبوا

اكونتات الفيسبوك .. لا و الله … هي دي دولة ذات سيادة و لا سوبر ماركت

عايزين محمود محي الدين .. يا سلاااام عينينا

وزير استثمار مبارك .. بتاع الخصخصة

اصل هو دلوقت يبقا مدير تنفيذي في صندوق النقد الدولي … يا سلاااام يعني هو كده بقا خادم مسجد سيدنا الحسين مثلا

بتروجوا لمحمود محي الدين و ماله

بس انا بقا مواطنة مصرية و من حقها تعرف فلوس 145 شركة وطنية اتخصخصوا .. راحت فيييين قبل ما تيجي يا دكتور محمود تقعد علي كرسي رياسة الوزرا و تبيعنا الاندرات بتاعتنا

1 – فلوس الشركة العربية للتجارة اللي اتباعت لرجل الاعمال فؤاد اسكندر فرج

و تمن البيع كان 13 مليون و 680 الف جنيه .. يا كفرررررة العربية للتجارة ب 13 مليون جنيه

دي كان فيها اصول بس ب 29 مليون جنيه

و اوعي تكون مفكر انه فؤاد اسكندر دفعهم … و النبي ابدااا ده سدد 6 مليون و 840 الف جنيه و الباقي راح عند العيلة المالكة و الحاشية .. مش كده يا دكتور محمود

القابضة للهندسة و تدخل علاء مبارك و بيعها بالمخالفة لقانون الشركات سنة 2008 .. بس مجلس الشعب السوزاني جاب حتة قماشة وسخة و فصله منها قانون اعتمده السيد وزير الاستثمار .. و راحت القابضة للهندسة بالكااااامل .. و فلوسها محدش عارف راحت فين

فضيحة القوائم المالية لشركة طنطا للكتان و الزيوت

الشركة دي بقا كانت في الحدود الادارية لمحافظة المنوفية و سعر المتر هناك كان ب 350 جنيه .. قوووم ايه قالك لا هي اسمها طنطا للزيوت تبقا تبع الغربية اللي المتر فيها ب 170 جنيه

و باعوها لرجل الاعمال علي اساس انها منوفية .. و دخلت الدولة علي انها غربية و فرق السعر طلع صدقة علي روح الدولة للمساكين من افراد العصابة و الاجر و الثواب علي اللللله

هو انت مفكر يا عزيزي ان دي فضيحة واحدة … ابدااا

دي اتباعت علي اساس مراجعة قوائم مالية لسنة واحدة فقط 30/6/2004

اللي كانت خسرانة فيها

و هي طول عمرها بتكسب مكاسب مهولة .. و تم تعريضها للخسارة بالأمر المباشر عشان تتباع

145 شركة وطنية بيعتهم .. وديت فلوسهم فين

في جلسة مجلس الشعب بتاريخ 2 يونيو 2008 تم استجوابك .. فلوس الخصخصة فين

رديت حصيلة الخصخصة واضحة واضحة ومرصودة و استخدمت وفقا للقواعد

و انك حصلت علي 1481 مصادقة من الجهاز المركزي للمحاسبات

و فتحي سرور قالك شكرااا يا دكتور محمود .. نتابع جدول الاعمال

ما هو كان واخد نصيبه بردووو .. بس محدش قالنا ايه هي القواعد اللي استخدمت فيها حصيلة بيع البلد .. و مقولتلناش بردو 145 شركة يطلع لها 1481 مصادقة ليييييييه

يا ريت قبل ما حضرتك تقعد في مكتب رئيس الوزرا تقولنا حصيلة تدمير قطاع الاعمال لمصر راح فين …. و انا هدعم اختيارك احنا اصلا بنحب اللي يسرقنا قد عينينا و الله

عايز تجيب كامل الوزير

طب هو اللواء كامل الوزير بتاع اقتصاد .. الراجل محقق انجاز في ملف النقل و ماشي علي خطة بمجموعة معاونة

عايزين تخربوا ملف النقل ليييييه .. طب لما تجيبوا واحد خريج حربية عشان ينجد اقتصاد في شغلة مش شغلته و يفشل .. يبقا خسرناه في الناحيتين

و هتجيب مين يكمل مشروعات النقل والطرق و الكباري و البنية التحتية … امك بقا مش كده

لا بنرشح طارق عامر

لا اله الا الله .. امنت بالله و رسوله

وقت ما قدم استقالة كتبت مطولة ادافع عنه و اتهاجمت من المؤيدين قبل المعارضين .. ده كماااان ألفتوا له قصص فساد

بقا سكر محلي محطوط علي كريمة دلوقت

أيها الصفحات الوطنية المغفلة ضحية اجهزة المخابرات المعادية .. بيلعبوا بيكم و لا اليويو اقسم بالله

ال 3 وجوه المرشحة وراها سبب

لو محي الدين جه هيتفتحله تاريخه الاسود و يبقا السيسي جاب اشطر بياع للبلد .. لو عامر جه يبقا السيسي بيجامله اصل داليا راشد يا سيدي و الصفقات .. و لو الوزيري جه يا سلااااام يبقا خلصنا منه للابد و خربنا قطاع النقل .. و لو اتحط مكانه ظابط .. إلحق يا جددددع السيسي بيعسكرها

يا اخي حسبي الله ونعم الوكيل في عقولكم

الرقعة دي محتاجة چاكو بتاعت زمان .. قبل تمارين ضبط النفس لأنها محتاجة مصطلحات اعتراضية كثييييرة

طب ما نسأل سؤال كده .. هو الوزيري لو جه او عامر

هيقبلوا يشربوا الشاي بالياسمين اللي مدبولي مش راضي يشربه عشان يفتح الطريق لمافيا رجال الاعمال انهم يدخلوا مشاركات مع استثمارات الخليج في الدولة بنسب مشوهة لكيانات ناشئة حالا عشان يهربوا من الضرايب و ياخدوا الاعفاء الضريبي ال 5 سنين و يستحوذوا علي مميزات الرخصة الذهبية

أديني قولتلكم الهجمة علي د. مصطفي مدبولي سببها اييييييييه

و اللي يحصل يحصل بقا .. قال هيسخطوك يا قرد قال هيعملوني ايه غزال

حكومة مدبولي لازم تمشي عشان واقفة في وش المافيا في انهم يهبشوا في الاستثمارات الجديدة

عايزين يجيبوا المعلم بتاع فيلم سلام يا صحبي شخلل عشان تعدي … الراجل عدي 145 شركة وطنية مش هيعدي استثمارات ياخي …… ياخي كفاية بقا

اللي بعده

كوكب الارض كله بيقر بانهيار السوق السودا للدولار

ما عدا المواطن المصري

ااه و الله زمبؤلك كده

مافيا العملة بتعمل ايه دلوقت مأجرة شوية مرتزقة ينزلوا بوستات ان الدولار في السوق السودا ب 34 جنيه … علي الرغم ان دي مش حقيقة

و انه مش متوفر في البنك

مع ان البنوك انضخ فيها اكتر من 100 مليون دولار

نظام عزز البضاعة المضروبة و قول عليه اكسترا .. تقوم تصطاد زبونها المغفل

ريد كريلزر كبير اقتصادي بلومبيرج انهاردة كاتب مقالة طويلة عريضة عن انهيار السوق السودا للعملة في مصر

فايننشال تايمز كاتبة انهم اتفاجأوا برد فعل السوق السودا في مصر بعد الهدوء الذي تعامل به المركزي المصري

بس الولا سوعدة اللي واقف علي قمة شارع الجزاير في المنشية بيسلك للاطباء و صقر قريش مأكد للناس ان الدورار وصل خمسة و تلاتشين جنيه يا بيه

أنا بحرت في بحر اقسم بالله

اجيب ارقام و احصاءات و تقارير و واقع ملموس .. و ألاقي حد يقولي لا بس انا لقيت بوست عند اكونت طائر الليل الحزين بيقول انه غير امبارح ب 33.5

طب انشالله ما اوعي ده ولا غير بنطلونه من شهر حتي

اللي بعده

البلد هتجوع و مفيش سلع

ألطم يقولوا الولية اتجننت

أعمل ايه اكتر من اني نشرت مخزون السلع الاستراتيجية للدولة نقلا عن وزارة التموين اللي فيه ان اقل سلعة في البلد مخزونها يكفي لحد 8 شهور

ليه انا گ مواطن مصري محترم أول ما اشوف بوست زي ده .. اروح افتح موقع وزارة التموين و اتأكد قبل ما اخد البوست شير و اقعد اولول زي مكسورة الجناح .. ليييه هااااا لييييييه

احسبوها كده لو 10 مننا كل واحد عمل كده .. و بعدين شاف الحقيقة 30 صديق

5 منهم عملوا شير

5 عندهم شافوه

شايفين بقينا كااااام .. ما هو ده دورك .. ده حق البلد عليك

لو واحد بيقول كلمة غلط علي أمك هتسكت له و لا هتبرأها .. ما تتعامل مع البلد علي انها جزء منك يا ابن الحلال

—————————————————-

اتصدقوا بالله انا لا ليا نفس لحسوات نسكافيه و لا غيره .. الحرب علي اشدها في الملف الاقتصادي … و الريس واقف في وش الريح بطوله

معاك ربك يا ريس و هو ولي الصابرين

عارفين مين أسوأ مواطن في مصر .. مش الفاسد و لا المعارض .. لأ دول مفضوحين و مفضوح غرضهم

المواطن الاناني هو الأسوأ علي الاطلاق

المواطن بتاع فيها لا اخفيها

يقولك و ايه لازمة مشروعات المدن ما يوقفها و يضخ فلوسها في الاكل والشرب

طب و الملايين اللي شغالين فيها .. اخرب بيوتهم عشان أعلف في كرشك

المواطن اللي يجعر في وشك و يقولك الفقير أخد اييييييييه

فتقوله اخد مشروع حياة كريمة .. و اخد نقل من العشوائيات

ف يرد ببجاحة و يقولك ما انا فقير و مستفدتش … طب هو عشان جناب أهلك مستفدتش أولع في كل اللي استفادوا … عنك ما استفدت يا سيدي .. انتحر و خلصنا منك

المواطن الاناني بسبب فشله .. محققش رغبة معينة عنده لأي سبب و ممكن يكون صاحب حق شوفوا بقا هوصل لايه

فيبدأ يشوه الناس اللي في المكان ده بالكامل وانجازاته و مميزاته

لكن انا مش هكون عنيفة و اعمم أبدا … احنا ضحايا لعملية تجهيل و تغييب وعي ممنهجة لمدة 30 سنة

واحدة زي عمري 42 سنة عشت منهم 30 سنة في مستنقع فكري … لو مشتغلتش علي نفسي و بحث و قرأت و اتمرمطت هنا و هنا عمري ما كنت هدرك كل الحقايق اللي اعرفها

كل حاجة كان متعتم عليها .. كام واحد عارف فضيحة شركة طنطا للكتان و الزيوت منكم

محدش كان بيقول لحد حاجة .. علي رأي الجنرال كنا ركووووبة ليس إلا .. هات الحمير اربطها هنا و حطلها العلف و العليق و دمتم

هسأل السادة اللي اكبر مني في السن

حضراتكم كنتوا بتروحوا انتخابات مجلس الشعب و الشوري

اقسم بالله ان ما كان بيروح الا عمال المصانع فب اتوبيسات ينتخبوا صاحب المصنع و ياخدوا ال 50 جنيه و باكو البيست و يرجعوا

اقولكم علي حاجة من الاعجاز السياسي في عهد مبارك

اخو جدي اتوفي سنة 2001 بس سبحان الله كان له صوت انتخابي سنة 2010 .. و حصل لولاده لخبطة في اوراق معينة فضلوا يصححوها لسنة 2014

الراجل معجبتوش الاخرة جه ينتخب في الدنيا و لو عجبه الحال يكمل معانا

احنا كنا عايشين في خرارة كبيييييرة … و للاسف مناخيرنا مش عارفة تعتاد ريحة الجليد معطر الجو

المافيا مش مستوعبة ان في رئيس مش قابل يخليها دبيحة ويقسم معاهم زي ما متعودين

من كام يوم بلف كده في الاخبار لقيت نعي لنائب مجلس شعب سكندري عن حزب مستقبل وطن

بس الاسم مش غريب عليا .. و انا عشان ذاكرتي رقمية ف بخزن وجوه و اسماء كتير

افتكرت ان المرحوم كان نائب عن الحزب الوطني زماااان

” مستقبل وطن ده لو متقطمش رقبته من دلوقت هيبقا الحزب الوطني التاني و الوجوه القديمة اللي فيه هتفرمنا و تعطل الدولة و هيقف قصاد الريس نفسسسسه “

يا جدعان كتفوني و لا نيموني و لا اعملوا فيا حاجة .. روح مريم فخر الدين متلبساني و عمالة أسيح للكل

هروح أعمل حاجة سخنة و اجي احكيكلم حدوتة ان اللي عايز يعمل حاجة للبلد بيعملها … ده لو لم تتعارض مع مصالحه

ما خلاص انا وديت نفسي في داهية

——————————————————

عملت كاكاو .. بيرخي الاعصاب

صلوا علي حضرة سيدنا النبي .. كان يا ما كان يا سعد يا اكرام

دولة كانت بتتبع النظام الاقتصادي المهلبية .. اصلها كانت تحت الاحتلال

ثم نالت الاستقلال فاتنقلت للاشتراكية … النظام الاقتصادي الاشتراكي

دخلت حرب و طلعت منها منهكة اقتصاديا .. قاموا عاملين لها restart بقا .. طفوا الرواتر اشتراكية شغلوه رأسمالية

ازاااااي معرفش

المهم قعدت تعرج أديلها 30 سنة لا هي عارفة نفسها اشتراكية و لا رأسمالية و لا بطيخية حتي

لأن العك لا ينتج الا عك

فالشعب كفر بالارض و الدولة و النظام و كل حاجة و جاب عاليها واطيها

ثم ربنا نصفها بقائد ابن حلال و عنده ضمير

لكن لجنة الخمسين اعتمدت السوق الحر گ نظام اقتصادي

و لحد هنا و مفيش أيوتها مشكلة .. وماله العالم كله حر اتحرر معاكوووو

لكن العالم حصله كارثتين

جائحة وباء يليها حرب شبه عالمية

الدولة دي عبارة عن مؤسسات + شعب

الشعب ربنا ابتلاه في أخلاقه .. خلي لصوص كتير فيه تظن انها بيدها الرزق و تغلي الاسعار و تعلي و تزايد

” طبعا في حاجات جشع ليس إلا . و حاجات عن عمد من اجل احداث حالة غضب بين الناس “

الحكومة قررت تعمل لجنة تسعير للسلع الاستراتيجية

و ده دور الحكومة

باقي مييييين يعمل اللي عليه الجالسون تحت القبة البرلمانية

ايوا يا چيلان و انتي عايزاهم يعملوا ايه .. ما بيقولهم موافقة يقولوا موافقة هيقطعوا نفسهم

معلش يا عزيزي

هو ده المكان الوحيد اللي يقدر يعلن الحرب علي الفساد و يقف في ضهر الريس

في حاااالة وحيدة فقط ميكونش ممسوك علي حد هكا و لا هكا

ما هو لو نائب مصاحب بيزنس مان خاربها و له نسبة

ده هيشرع قانون يعلقني من شعري لو كتبت كلمة تاني عليهم

عزيزتي اللجنة التشريعية في المجلس الموقر

تحية طيبة و بعد

نحيط سيادتكم علما بأن المواطن المصري الذي وضع ثقته فيكم .. و قام باختياركم .. قد اختاركم حتي تمثلونه في الدولة .. و لااااا تمثلوا عليه

اختاركم لمساندة رئيس الجمهورية للعبور بسفينة الوطن لبر الامان .. و ليس لتقفوا منتظرينه علي رصيف الميناء

السادة النواب :

تشريعات حماية الشعب في الظروف القهرية فييييييين

استجوابات القائمين علي اجهزة حماية المستهلك فيييييين

قوانين طوارئ الظروف القهرية فيييييين

هفضل اعيد و ازيد لحد ما تقفوا علي حيلكم جنب الراجل اللي بيحارب لوحده

طب اللجنة بتاعت شئون الاعلام تخصص لجنة من كام شاب كده يردوا علي الشائعات

و ادفعولهم من مخصصاتكم الكتيييير اللهم لا حسد يعني

عارف يا سيادة رئيس البرلمان

جريدة the hill الامريكية عملت تقرير احصائي عن اكتر 20 دولة في العالم مستهدفة بالشائعات

طلعت مصر رقم 1 بمعدل 3 شائعات يوميا اما تستهدف شخص الرئيس او اجهزة حكومية و سيادية او الشعب

عارف يا سيادة رئيس المجلس الموقر :

انهاردة في تقرير علي العربية عن ظاهرة ” الاوڤر برايس ” في مصر

قالك انها بدأت في سبتمبر 2021 و بوظت سوق السيارات

انهاردة ظهرت في الادوية و سلع اخري

فيييييين تشريعات سيادتك ضد المصيبة دي .. ولا هتفضل تتفرج

سن قوانين تقطم رقبة الناس دي

ما هو يا تقوموا بدوركم التشريعي .. يا الريس يعلن الاحكام العرفية و اي متلاعب في أكل و شرب و صحة الشعب يتحول للمحاكم العسكرية

و تتفضلوا تقعدوا في بيوتكم بقا و توفروا علينا ملايين .. وتشوفوا مصالحكم مع صحابكم وتسيبونا في حالنا

—————————————————–

الناس اللي كانت بتسأل علي موضوع النساجون الشرقيون

بصوا ده اسمه التدوير الوهمي للاصول

يعني الشركة بتبقا جواها مجموعة كيانات .. الكيانات دي بتبيع لبعض و توهم الناس انها بتمم عمليات بيع بأسعار عالية

فترفع قيمة الاسهم بتاعتها .. و تزود التداول عليها

و ده يزود رأس مال الشركة و قيمتها السوقية

شغل صياعة مالية و لعب بحرفنة عالية

لكن ده لا يمنع ان في رجال اعمال وتنيييين .. شورفاء .. أتهاااار

بينقلوا استثماراتهم خارج مصر عشان الريس مجشم وشه عليه

زي راعي المهرجانات الاول .. و الشيفروليه

أنا شايفة اني اشطب الرقعة علي كده .. قبل ما يقابلني واحد في الشارع يقولي you know too much

—————————————————-

قبل ما نختم

حابين بس نشوف فرنسا

لأن الموضوع تفاقم

طبعا فرنسا قضت ليلة عيد سودا و اعتداءات و تخريب

مارين لوبان و الشاب اللي جابته رئيس حزبها

اطلقوا دعوات لطرد الاكراد الاتراك من أرضهم

و تم توصيف الاعمال التخريبية اللي حصلت في الشوارع و المباني علي انها افعال ارهابية

و طبعا متضامن معاهم كل الاحزاب القومية .. و الشعب الفرنسي اللي مقهور طبعا علي مقدراته

طبعا ضد القتل علي الهوية .. و القتل بصفة عامة و ما تعرض له ال 3 اكراد هو عمل عنصري ارهابي

لكن ده ميسمحش انكم تخربوا البلد اللي لماكم يعني

اليومين الجايين هنسمع عن ازمة دبلوماسية بين تركيا و فرنسا

و اليمين هيتهم تركيا برعاية الارهاب و هيستشهدوا بإيواء تركيا لارهابيين المحرضين ضد مصر ويفرشوا لاردوغاز الملاية و هنسمع أسرار تذاع لأول مرة .. انتظرونا مع مارين لوبان شو و برنامج الحكاااااية

اردوغاز بقا عشان يخلص من وصمة العار دي

هيعمل حملة اعتقالات أوسع و يلم فيها شباب الاخوان كمان .. و هما اساسا اقسم بالله بياكلوا من الزبالة حرفيا .. و عايشين ال10 في اوضة 2 متر

و في النهاية لا يسعني غير اني اقول ان المؤيدين حوالين الريس

اما يهوذا مستني يبيعه بتلاتين من الفضة و دول الاعلام .. او بطرس يشهر سيفه حماية له في وجوده لكن لو وهن هينكره قبل صياح الديكة ودول البرلمان الموقر و امامهم فرصة توبة بطرس .. او يزيد بن معاوية خايفين ينهشوه عشان تاريخهم بس عندهم استعداد يسيبوا شمر بن ذي الجوشن يفصل راس سيدنا الحسين عن جسمه و هما بعيد غيرة و غل و دول رجال الاعمال

و شوية غلابة كده ملهمش مصلحة الا انهم عشمانين في وجه الكريم انهم يوقفوا مصر علي رجليها عشان ملهمش غيرها

عائلتي الرائعة لكم مني كل الود و الحب و العرفان

هذا و استغفر الله لي و لكم و لمولانا عزيز مصر و اللهم إنا نسألك بهية و فقط بهية حلوة الحلوات

كتبته

دكتورة/جيلان قاسم