في الجنة يا شهيد
بقلم / زينب الجندي
في الجنة يا شهيد
قولي يا ابني
مشفتش ابني؟؟
كان لابس زيك تمام
طقيه بنسرها علي راسه
والبياده والحزام
وفي ايده ماسك سلاحه
وفي الطابور علي طول قدام
واد سماره وهبته راجل
والقلب لساه يدوبك غلام
ولا عمره يوم عن امه اتأخر
ولا عمره يوم عن واجبه نام
كان لسه مخلص عزاله
كان لسه مخلص علام
لو حد شافه يقوله ابوه جاله
والشقة خلصت دهان
وخطبتك بتسلم عليك
والعيلة بعتالك سلام
ابنك يا والدي عند ربه
شهيد يشفع للأنام
يمسك ايديك يوم القيامة
يحميك يوم الزحام
ويخدك لباب الجنة
ويرفعك اعلا مقام
ابنك مامتش يا ابويا
ابنك حي عند ربه ف الجنان
ااااه يا ولدي
خدك الموت مني
وانت ف عز الشباب
خدك وسبني
وساب شعري اللي شاب
خدك ورماني ف وسط العذاب
طب اقول ل امه ايه
لما تسئلني عن ضناها اللي غاب
ابني كان بينه وبين عرسه مفيش
ابني راح عندكم ومجاليش
دانا ف الدنيا دي غيره مليش
ابني مات عشان وطن بحاله يعيش……….
************************