ساعة عصرية
حكاوي بالعامية
الحلقة التاسعة
بقلم : محمد فتحي شعبان
صباح الخير أو مساء الخير حسب الوقت اللي بتقرا فيه ، النهاردة تالت يوم عيد الفطر المبارك كل سنة وانتو طيبين ،
من فترة وأنا متوقف عن كتابة ساعة عصرية كنا صايمين ، المهم موضوع التيك توك واللي ناس كتير بتهاجمه ليه مش عارف الناس اللي بتعمل مقاطع التيك توك دي نجحت ووصلت لمستوي مشاهدات عالي جدا وبتكسب فلوس كتير ، كل ده من الهيافة والتفاهة والمسخرة اللي بيعملوها ، امبارح اتفاجئت إن في ستات كبيرة بتعمل مقاطع تيك توك غير طبعا البنات والستات اللي بينزل اي هيافة ومسخرة وفي شباب ورجالة كمان بيعملوا حاجات مسخرة ، طيب يعني ايه يعني إن احنا وصلنا لحالة صعبة من محو العقول ومحو الحياء من النفوس ( إن لم تستحي فافعل ما شئت ) معدش عندهم حياء ، لما واحدة أو واحد يطلع يعمل حاجات مسخرة وهيافة وعارف أن اللي حيتفرج عليه أهله وصاحبة وناس كتير عارفة يبقي معندوش حياء ، لما واحدة ست متجوزة أو واحدة آنسة أو واحدة جدة وتطلع تعمل اللي بيتعمل ده يبقي معندهاش حياء واللي متجوزها لو عارف يبقي ديوث .
في نقطة تانية الناس دي بالفعل نجحت ، آه نجحت في أنها توصل للي هما عيزينه فعلا ، نجحوا نجاح باهر في الفشل يعني الواحد لما يقرر إنه يفشل ويفشل يبقي كدة نجح ولا فشل الإجابة فاشل ناجح ، مركزين معايا ولا ايه بلاش تركز احسن .
الأستاذ : أنيس منصور ……من اول يوم العيد بدأت قراء في كتاب( دعوة للإبتسام ) الكتاب جميل جدا ، في خلال ثلاث ايام العيد انهيت قرايته تالت يوم الظهر هوة فعلا دعوة للإبتسام أسلوب شيق في الكتابة ،قريت له قبل كدة كتاب (مواقف ) الكتابين عبارة عن مقالات أسلوب كتابته بياخد القارئ يخليه يسافر معاه ، في كتاب جمل جدا له عنوانه ( الذين هبطوا من السماء ) ده عالم تاني من الخيال ، حقيقة كأنها خيال أو خيال كأنه حقيقة .
الموضوع محتاج كلام كتير لكن احنا في عيد كفاية كدة
وكل سنة وانتم طيبين
