ساعة عصرية حكاوي بالعامية الحكاية السابعة والعشرون

وصباح الخير علي الجميع ، الله يحفظكم ويحفظ حبايبكم وأولادكم و بناتكم .

امبارح نزلت صورة في القصص ، محمد ابني هو اللي مركبها ، صورة بشعر وواد حليوة ، حسيت نفسي اتغيرت خالص و تخيلت نفسي بالشكل ده ، الموضوع كبير يا جدعان ،انا بقيت واحد تاني طبعا صورتي حقيقة و صورتي الغير حقيقة موجودة مع المنشور ، أما المفاجأة بقي أم سفيان عجبتها الصورة وبتقولي أنا عايزة شكلك يبقي كدة ، طب حيبقي كده ازاي ، أنا نفسي عجباني الصورة وعايز ابقي كده هههه ، اركب باروكة واخس شوية اعمل نيو لوك جديد ، الواد خلي أمه تقلب عليا دى ممكن تعملي قضية خلع عشان اتقرعت .

الحياة بتسرقنا والعمر بيجري بينا بشكل رهيب ، كتير مننا مش بيستمتع بحياته الحياة بتمر ضغط في ضغط ، لحد لما نلاقي نفسنا لابسين في حيطة ، العمر خلص الكلام ده بقوله لنفسي ،مش قلتلكم الصورة دي غيرت حاجات كتير.

الناس بقي شغلهم الشاغل الاسعار والقرض وتعويم الجنيه والجنيه حيغرق و…و..و….كلنا شركاء اتكلمت في الموضوع ده اكتر من مرة وحنتكلم فيه تاني وتالت ، أنت مسئول وانا مسئول وهية مسئولة أيوة مش الحكومة بس ، الحكومة فيها فساد ده أمر مينكرهوش عاقل كل حكومات العالم فيها فساد ، كل انسان مننا فيه جزء فاسد لازم يتم تعديله ، اللي بيحصل في دول الإسلام عموما من قتل وتشريد احنا مسئولين عنه لا بد من احنا نفوق ، أيوة احنا في غيبوبة أيوة غيبوبة يا ريت نصحي .

مقولة مأثورة عن الإمام يحي بن معين ( إذا سمعت فقمش وإذا حدثت ففتش ) اقولها بشكل آخر إذا قرأت فقمش وإذا كتبت ففتش ، اقرا في كل شىء وفي كل مجال ، بعض الناس بيقرا في مجال محدد ممكن روايات وقصص وغير ذلك من المجالات ، لكن ممكن ميكنش قرأ كتاب عقيدة في حياته كلها أو قرأ كتاب فقه أو حديث أو ممكن يقرا قراءة عابرة ، يا جماعة القراءة مش هواية القراءة ضرورة من ضرورات الحياة ذي الميه والهوا ، يعني مينفش تستغني عنها ، كتب القضايا الفكرية مهمة جدا لكن قبلها لازم تحصن نفسك بدراسة العقيدة الصحيحة عشان يكون عند حد الممانعة يعني عندك حصن ضد الأفكار الفاسدة ، تبقي عارف انت بتحط رجليك فين مش ماشى وخلاص ، لازم تبقي عارف اللي بيدور حواليك وفاهم ده حصل ازاي وامتي .

كتاب تاريخ الإسلام للدكتور راغب سرجاني جميل وأسلوبه سهل وميسر واختصر كتب كتير ، يعني الكتاب بيغنيك عن كتب كتير في التاريخ ، إن شاء الله لينا جولة معاه .

استودعكم الله …رزقكم الله