علاقات فاسدة

دخلت شارع صغير و عربيه واقفه غلط قافله الشارع بحيث ان العربيه تعدى بالعافيه و ممكن تخبط الباب لو العربيه دى متحركتش من مكانها و لو حركة بسيطه

المهم واحد واقف قدامى قاعد يقولى طيب ارجعى طيب تعالى يمين طيب ارمى شمال كدا !!!!

قولت له لو صاحب العربيه اللى قدامى دى حركها هيكون الموضوع أسهل لو تشوفه فين

قالى بس حاولى قولت له صعبه المكان ضيق قوى و انا هخبط غصب عنى

شوف صاحب العربيه اللى قدامى

الصدمه ان اكتشفت ان هو صاحب العربيه اللى معذبنى و بيحاول ان انا احل المشكله و هو واقف يرشدنى

اهه كدا بعض الناس فى حياتنا

يفضل يقولك حاول استحمل طيب حاول تانى كدا طيب اعمل نفسك مش سامع تجاوز حاول تتعامل عادى

و هو في ايده الحل بس بيضغط عليك انت لانك بالنسبه له الحل الاسهل

بيحاول معاك لانه مش عايز يغير شئ و انت اللى تتغير و تدوس على نفسك عشان الدنيا تمشي

و مش فارق معاه ان كل دا على اعصابك و على حساب نفسك و انك ممكن تخبط عادى

اعرف بقى ان هو اللى لازم يتحرك و يتغير و الا هيكون مش باقى عليك