عمالقة زمن الفن الجميل
بقلم: ياسر عنانى
سلامة إلياس فنان من الزمن الجميل
شوفناه في الأفلام القديمة ممكن كتير في الجيل ده وحتى في جيلنا ميعرفش اسمه لكنه أكيد فاكره بأدواره الجميلة خصوصا اللي عملها مع فؤاد المهندس في أفلامه ومسرحياته.
تعرفوا ان سلامة إلياس ممثل يهودي وأنه من اليهود اللي رفضوا يسيبوا مصر..
أتولد سلامة إلياس في في 27 فبراير 1911 في مدينة القاهرة لأسرة يهودية، ودرس بمعهد التمثيل ثم عمل في عدة فرق مسرحية منها فرقة( نجيب الريحاني) و(فاطمة رشدي)، واشتهر بعدد كبير من الأدوار المساعدة
برغم انه ابتدى بدري في المسرح إلا أن شهرته وأعماله الكتيرة ظهرت في الستينات والسبعينات لما ابتدى يشتغل مع فؤاد المهندس،و شارك في أكثر من” 150″ عملاً بين السينما والمسرح والتلفزيون.
وكان آخر أعماله فيلم “أحوال شخصية”، في عام 1992. سلامة إلياس رفض دعوات كتيرة للهجرة لإسرائيل ورفض الاعتراف بيها كدولة وعاش في مصر هو وأسرته وفي حديث سابق لابنه أكد انهم كأسرة عاشوا في مصر دون أن يتعرضوا للاضطهاد ..
سلامة إلياس كان بيقول دايما انه اتولد في مصر وهيدفن فيها وفعلا مات في مصر سنة 1993 واتدفن فيها.
