موجوعة عليك قلبي يبكي دم ما عشناش مع بعضنا اما نحس بيك مذابيا نطل عليك نقسم معاك وجيعتك نسألك على أحوالك، نشربك،نوكلك،نرقدك كي صغيري،نحسسك بحاجات انت عمرك ما حسستني بها و كي صارت انا صغيرة ما نفهم شيء من الدنيا غير اني نفرح بالخرجة و الحاجة الي تشريهالي. مسخفني حالك كنت كي الأسد تصول و تجول،طول و قد و لبسة و سفر. أما ريت ما تدوم لأحد خاطرها فانية. ساعات نقول دعايا طاح فيك و إلا ربي سبحانو يختبر في حبي ليك. ممكن فما برشا حاجات عشتهم نتمنى يتفسخوا من ذاكرتي، خاطر بنتك الي تخليت عليها صغيرة، اليوم كبرت و ولات مرا يا بابا……يا قداش توحشت نقلك كلمة بابا، عنا سنين ما تقابلناش و نسكنوا قراب…سنين ما خرجناش، ما كليناش، ما عملنا حتى شيء مع بعضنا…أحلامي كانت بسيطة معاك، حاجات عادية البنية و بوها يعملوهم كل يوم…هذا الكل أنا تحرمت منو ،منعرفش الغلطة منك و الا من أمي. المهم انا عشتو و حسيتو و الأهم انا الي خلصت الفاتورة. انت حتى ولدي ما تعرفوش، و من غير ما تلومني كي ما خليتكش تحملو و تبوسو، ما نحبش تصويرتك ترسخ في خيالو خاطر انا ما عندي حتى ذكرى معاك. مذابيا ننساك و ننسى وجيعتي معاك و خاطري المكسور. ممكن نكون متناقضة في مشاعري خاطر نحبك و مسخفني حالك أما زادة نكرهك و مانيش مسامحتك الى يوم يبعثون وقتها تو تشوف الحساب و انت بالذات ما تسألش على قلبي الي مات. تبعثلي تحب تشوفني،علاش بش تطلب مني السماح : على شنوة بش نسامحك بالله؟ على صغري الي تعدى مش كالصغار؟ و الا على سن المراهقة الي ما لقيتكش تخاف عليا؟ آه تو نسامحك على عرسي الي جيت من بعيد بش تراني كيفاش طلعت عروسة. فيق أمان حتى يدي ما شديتهاش و ما تمنيتليش الهناء. خلي عاد كي ولدت نبكي و نعيط يا بابا اجريلي. و الا بالك بش نسامحك خاطر الدنيا كي ظلمتني لقيتك في ظهري حاميني؟ و الا و الا … آش بش نحكي و آش بش نقول ؟ كل شيء في حياتي فاتك . و زدت نقمت عليك كي جربت الكبدة و غلاوة الضنا. ما نكذبش عليك مسخفني حالك خاصة كي سمعت الي انت في آخر مراحل المرض و حياتك . أما ما نجم نقول كان ربي يشفيك و يخفف عليك. الي انت تحس فيه ما يعلم بيه كان الله سبحانو. و كي ندعيلك كيفك كي اي إنسان مسخفني حالو و مرضو الي هدو بعد قوتو. سي الطاهر، هذا آش تستحق اناديلك. انا تبدلت ، الدنيا علمتني نعفس على قلبي و نتعدى، علمتني أنادي للأشياء بمسمياتها و علمتني زادة نحط كل إنسان في بلاصتو و نعطيه حجمو الطبيعي و قدرو . نقلك حاجة انا جربت إحساس الموت في اغلى عبد عندي و جربت اليتم من 10 سنين مش اليوم بش نخاف منها. تعرف علاش؟ خاطرك علمتني و سنستني نعيش بلا بيك، و تعودت على الشيء هذا. انت مش بتموت بالنسبة ليا ، انت أصلا ميت و عمرك لا حييت عندي. فما برشا كلام آخر حبيت نقولو أما راعيت شوية مرضك و خفت ربي فيك من باب الإنسانية. ياسر جيت امخر يا سي الطاهر. كنت نتمنى الظروف تكون مختلفة. نبدى ملهوفة عليك، ما نحبش نعيش حتى لحظة بعيدة عليك. بالله عليك ما عاد تبعثلي حتى واحد و حتى جبهية، موضوعك منتهي بالنسبة ليا ، باب و سكرتو. يزي مش وقت بش نعاود نحل الجرح و ما نعرفش كيفاش نداويه مرة أخرى. الصعيب تعديتو و توا نخمم كان في مستقبلي عكسك انت الي عشت حاضرك و ما خممتش فيا . صدقني، و الأعمار بيد ربي ، كان تموت صعيب نحضر الجنازة ، مش نبكي و نحزن عليك . مستحيل، و ما تترجاش نسامحك و لا انت حي ،و لا انت ميت . كل شيء يربطني بيك دفنتو آخر مرة كي تقابلنا و حكينا ، تتذكر النهار أذاكا . ريت الدنيا دوارة و غدارة. الحمد لله جات فرصة بش تعيش إحساس واحد يتمناك و يستناك تمد يدك و انت ما تعبروش. شفت إحساس خايب. أنا نسيت و كبرت و مسحت دموعي . أما توا وقت وجيعتك و دموعك. حطيت روحك في بلاصتي و جربت آش حسيت، و النار الي تكويت بيها شعلت في جاشك. نحرمك حبي و عطفي كيف ما حرمتني. ما تنجمش تأثر فيا بحتى شيء خاطرك تكبرت عليا . محبتي ليك ماتت قبلك يا بابا، انت عايش على الأوهام ، وانت باقي متاع ماضي الأيام. ممكن ، اي ممكن نهار آخر نتقابل مع أولادك الي هوما إخواتي في الأصل و نحاولوا نبنيو علاقة موجودة و انت فسختها. حسبي الله ونعم الوكيل فيك .هذا آخر كلامي و خليني رايضة في حياتي مانيش ناقصة مشاكل، حتى الناس الي تبعث فيهم نحشم نقلهم الحديث هذا و نبقى نفسر و نبرر في المواقف، و نبان الطفلة الي قلبها حجر و ما تنجمش تسامح بوها و هو مريض و نزيدو ندخلو في متاهات. نتصورك تتفهم ردة فعلي بعد ما خليتني مقسومة نصين. انت تبكي على دهر ضاع عمرك فيه و أنا بكيت على راجل خاب ظني فيه.
