” كلام من القلب “
عم حبيش والحكومة المصرية
كتبت / نسرين نبيل
عم حبيش يحب الفرافيش
من يومه بيضحك حتي لو مافيش
كبر وأتعلم وأخد الدبلومة
ومن يومها وهو شغال في الحكومة
بس من ساعتها وأتقلب حاله
وبقي نكدي ومكلكع كلاكيع
وحواجبه عالطول مقلوبة فيونكة
أي مواطن يتقابل بيه
لازم يزعق ويشخت فيه
مالك يا عمي ماكنتش كده ؟
قال من همي بقيت أنا كده
قاعد وقت طويل قدام جهاز مافيه الخير
لو عملت فيه أي حاجه يتلغبط ويبوظ بزيادة
ولا المرتب حاجه تغيظ
مش مكفي . أي حاجه
قاعد مكتوم مليان هموم
خلوا همومي ترحل عني
وساعتها هاكون متهني
وأضحك في وش الناس
وما تبقاش عيشة وخلاص
مالك يا عم حبيش ؟
راحت فين الفرافيش ؟
ما تروق. وتسيبها علي الله
والمواطن غلبان زيك
ما تحطش همك فيه
سيب همك علي اللي خلقك
وهو هايتصرف فيه
مالهاش لازمة أبدا والله
نقرف بعض في مصالحنا
لازم نكون أيد واحدة
علشان الحياة تقدر تفرحنا
روق وفوق يا عم حبيش
وأرجع تاني حب الفرافيش
