” الشغل مش عيب ولا حرام ”
بطعم تاني .. عربة قهوة متنقلة علي الكورنيش
حوار:روان أشرف محمد
عبدالرحمن فرغلي عبدالله محمد ،طفل يبلغ من العمر ١٣عاماً، أراد أن ينشأ مشروع خاص به ليُجني بعض المال لأكفاء حاجة المنزل والتكيف مع ظروف المعيشة .
متي حصلت علي فكرة المشروع وكيف بدأت في تنفيذها ؟
بالنسبة لفكرة المشروع أنا بقالي اربع سنين موجود هنا من وأنا عندي ست سنين كنت بشتغل ، أشتغلت الأول في محطة مصر وأشتغلت هنا علي البحر لحد ما بقا عندي١١سنة حبيت أعمل حاجة لنفسي مشروع خاص بيا وكمان أقدر أصرف بيه علي البيت ، أبتديت في تنفيذها عملت العربية دي وبدأت أعمل شاي وقهوة وينسون وحمص الشام ونسكافيه وحاجات بسيطة جداً وبعد كدة جيبت حاجات تانية وغيرت من شكل العربية علشان الحاجات تبان والناس تشتري مني .
أول يوم نزلت في الشارع كان موقف الناس أتجاهك ازاي ؟
الناس أتعاملت معايا عادي واعتبروني شخص كبير وكمان أشترو مني علشان يشجعوني لأنهم عارفين أن العربية دي أكل عيشي مينفعش حد يقولي أمشي ووقفو جنبي لحد ما كبرت العربية وناس كتير بقت عرفاني هنا .
الأسعارعندك بدايتها كام ؟
الاسعار عندي بتبدأ من خمسة جنيه وأغلي حاجة عشرة جنيه .
بالرغم من صُغر سنك كيف كان موقف أهلك عندما عرضت عليهم الفكرة ، ومن الذي قام بتشجيعك ؟
الشغل مش بالسن أنا بساعد في مصاريف البيت من صغري أهلي شجعوني وساعدوني كتير ووقفو جنبي لحد ما ابتديت المشروع وجيبت العربية وقدرت أكبرها لحد ما بقت بالشكل ده .
ما هي مواعيد عملك ؟
مواعيدي كل الأيام من الساعة ٩ الصبح إلي الساعة ١٢بليل .
المشروع بتاعك نفسك يبقي ازاي ، وما هي خططك المستقبلية ؟
نفسي المشروع بتاعي يكبر والناس كلها تعرفني وتيجي تشتري مني ويبقا عندي مكان ، الفترة الجاية هشد علي نفسي جامد واشتري حاجات اكتر علشان اكبر العربية بتاعتي .
ما هي طرق تعاملك مع الكومنتات الايجابية والسلبية ؟
مش برد علي الكومنتات السلبية لأن الأرض دي لكل الناس وده أكل عيشي مش هنكسف منه الكومنتات الايجابية بتفرحني لما بلاقي حد منزلي بوست أو بيقولي كلمة حلوة بتشجعني وبتخليني أطلع شغل أحسن كل مرة .
نصيحة تحب توجها لكل شخص حابب يعمل مشروع خاص بيه ..
الشغل مش عيب ولا حرام أنت واحد من الناس زيهم أنزل واتعامل عادي معاهم هتلاقيهم واقفين جنبك وبيشجعوك علشان تطلع أحسن ما عندك والمشروع بتاعك يكبر وينجح .
