مزاد علني
خشى يا هانم خش يابيه
عندى حاجات بتموت لما تعيش
عندى حاجات لو راحت ما تجيش
عندى حاجات من غيرها ما نمشيش
عندى حاجات فى واجعانا
ما تتقالش
وعندى كلام مخنوق بلجام
وعندى نفاق بس بأحجام
وعندى عيون للزيف خدام
وعندى عيون جعانه من الايام
عندى حاجات من خوفنا بنخسرها
عندى حاجات بأيدينا بنكسرها
عندى حاجات بتغيب
عن مضمونها لو مرة حاولنا نفسرها !
وعندى حاجات بتدغدغ
فى الصحة
وعندى حاجات بهتانة ومش واضحة
وعندى حاجات ماتت بالصرخه
وعندى غلابه بتصرخ من الجوع
وماحدش عايز يجاوبها فى زمن الضياع
وعندي ضمير للغير متباع
وضمير متعود على الاوجاع
وعندى خسيس فى جميع الاوضاع
عندى حاجات نعملها ونتندم
وعندى حاجات نهملها فنتقدم
وعندى حاجات النجاح بيغيب
ويصمت وفجأة فتتهدم
وعندى كلام مكتوم
وعيون جميله لكن حلم
وخيال وجمال وعلم
وعروضنا بتيجى من الواقع
والواقع دايما صعب ومرا ! ؟
يالا ندخل على الزمن المر ؟!
ونشوف أصعب اوجعنا !؟
يارب يكفينا شر ايامنا
قولو امين
بقلمي / الشاعرة
سوسن النجار
