عاملة زي كيس الجوافة.. غادة: جوزي أكل صوباعي وبيضربني عشان المخدرات
واقعة مأساوية تعرضت لها السيدة غادة على يد زوجها.. فقد وقعت فريسة لها تحت تأثير المواد المخدرة التي يتناولها، وقام بتلقينها علقة ساخنة وصلت إلى عضها في أحد أصابعها وإصابتها بجرح.
سيدة تستغيث من بطش زوجها
عض صوباعي وكان هياكله باسنانه.. بهذه الكلمات بدأت غادة حديثها قائلة «من 9 سنين أتخطبت لجوزي وأستمرت الخطوبة 4 شهور، وفي الخطوبة كان بيعاملني كويس جدا، وبعدين أتجوزنا ومن أول يوم مشوفتش يوم عدل، كله ضرب وأهانة وأنا أستحملت كتير منه بس خلاص مبقتش قادرة».
وتابعت غادة «ربنا رزقني ببنتين واحدة 8 سنوات والتانية 4 سنين، وطول السنين اللي فاتت كنت بشوف منه أبشع أنواع العذاب والضرب، مرة ضربني على ضهري بالترابيزة بسبب خناقة بينا، ومرة تانية ضرب رجلي في السرير ومن ساعتها وأنا عندي الغضروف بسببه، ومكنش يخليني أروح أتعالج».
غادة: عض صوباعي وكان هياكله
وأضافت غادة: كل مرة كان بيضربني فيها كنت باخد حاجتي عشان أمشي وأسيبه، ياخد مني شنطتي وحاجتي وهدومي ويقولي تعالى أمضي الأول على تنازل عن كل حاجة وهتمشي كدة من غير حاجة، وكنت برجع وأقعد تاني عشان خاطر عيالي وعشان مترميش في الشارع والمحاكم.
وأستكملت غادة ضحية زوجها قائلة «يوم الخناقة الأخيرة هو رجع من الشغل ودخل ينام، والبنات كانت بتلعب مرة واحدة لقيته صحي من النوم وبيشخط فيهم، وجالي قعد يشتم فيا ويقولي إنتي قاعدة زي كيس الجوافة البنات بتضرب بعض وأنتي ساكتة وهما كانوا بيلعبوا عادي، وراح ضربني ومسكني عشان يخنقني».
سيدة: أنا عايزة أطلق من جوزي
بعد ما مسكني عشان يخنقي حاولت أهرب من إيده… تستكمل غادة قائلة «حاولت اشيل إيده راح عض صوباعي لحد ما حسيت أنه خلاص هيتقطع وهياكله، بالعافية فضلت أشد لحد ما طلع صوباعي بالدم، وأترميت على الأرض أصوت، وبعدها قولت له عايزة أروح لدكتور قالي هاتي مرهم وخلاص».
بعد 4 أيام كنت كل يوم فيهم بقوله وديني لدكتور يقولي هاتي مضاد حيوي، لو أتقطع مش هكشف عليكي، وفي اليوم الرابع روحت لدكتور وأول ما روحت دخلوني عمليات وأتصلت بيه أقوله عشان يبعت فلوس قالي مفيش فلوس، أنا عايزة حقي ومش عايزة حاجة تاني، حرام اللي هو عمله فيا، أنا عايزة أطلق منه وأخلص من العيشة دي.
