خليك واعي،

ليه سكتوا ما تكلموا!!!

لما كان يحصل مشكلة بين زوجين وييجوا الاهل يدخلوا ..

تسمع الآتى

مش الرجل بيصرف كويس ..ومش مخليكى عايزة حاجة ..احمدى ربنا وعيشى ..

والغريبة ان الكلام دى بيجى على لسان اهله إلى هو احنا ابننا مش مقصر ..

مش الست مراعاية بيتك ومنظفاها ومنظفة أولادك..يا عم قول الحمد لله وكل عيش..

ليه سكتوا ..

عن الاحتياجات التانية ..واغفلوا الصفات الإنسانية واهتموا بالقشور والسطحية فى الأدوار..

ليه ما قالوا لها ده رجل طيب وبيحبك وشابلك جوة عينيه لكن هو طبعه كده او الظروف .

بس هو محتاج منك تقدير واحترام للى بيعمله علشانك.. …

ليه سكتوا وما قالوا له ..دى بنت حلال وبتحبك وطيبة وجدعة وشايلاك جوة عينيها ..بس هرموناتها كده ..

ومحتاجة شوية حنية وكلام حلو واحساس بالأمان..

ليه سكتوا وما نصحووا الاتنين..

انتم فى نعمة ورزق جميل ..حافظوا على بعض واتمتعوا برزق ربنا ونعمته وولفوا على بعض وسامحوا..واعطوا بحب ورضا ..

انتم ما لكم غير بعض..خلى همكم وعيونكم جوة بيتكم..وبلاش نبص فى عيشة غيرنا..

ليه سكتوا وما اتكلموا..

ان الدنيا مش دار راحة ..وانها محتاجة سعى ومجهود علشان نعيش كويس..

ليه سكتوا ولما اتكلموا ..

كان كلامهم كرباج بيدمى القلوب ويكسر النفوس..

لما تحبوا تتكلموا ..اتكلموا وانتم فاهمين..مش وأنتم حافظين..