.ٱنات مبعثرة بقلم الشاعرة / صباح غيث (شاعرة الريف) متابعة المستشار الإعلامي دكتور/سامح الخطيب العمق نيوز
.ٱنات مبعثرة بقلم الشاعرة / صباح غيث (شاعرة الريف) متابعة المستشار الإعلامي دكتور/سامح الخطيب العمق نيوز
أنا أنا ضحكة فى زمان الخوف
أنا أنا صرخة حياة تتحدى الظروف
أنا أنا كلمة حق يضحى علشانها ألوف
مكسوفة وحيرانة ليه يا دقات القلوب ؟
إوعى تقولى نفسى عن الحب أتوب
دا الحب نور الأمل فى رحلة الغروب
يا ليل يا جماع الويل واحشنى نور الشمس
ونظرة حب صافية تدوب جبال اليأس
عطشان والميه فى العالى وملهاش حس
ودُق دُق دُق يا مجهول على ببان الروح
جوايا كلمة نفسى أقولها يا ترى مسموح ؟؟؟
قوووووول
أقول إزاى إزاى وأنا متكتف وقلبى مجروح !!!؟؟
سيبك منى أنا وكلمنى شوية عن نفسك
يا ترى لسه فاكر أنت مين ولا نسيت نفسك ؟
غريب الوطن والروح والغربة سكتك وبختك
زحمة ومسرح كبير وكله بيتفرج على كله
وبيلعب دور البطولة ضمير مبسوط بذله
وألسنة سكاكين بتاكل فى لحمنا وتشله
ونهارك أخبر يا ابن الإيه يا بياع الوهم
عامل نفسك مش عارفنى بالذمة عندك دم
بتبيع الميه فى حارة السقايين اختشى واتلم
حطينا النار جنب البنزين وقلنا عااااااادى
وحولنا الجد هزار وبرده قلنا عااااااادى
ودخلنا برجلنا المتاهة ولسه بنقول عااااادى
جيلك يا بكرة وجايب لك معايا هدية
هدية إيه ؟؟؟؟؟؟؟
حنان أمى وضحكة أبويا وشاى العصرية
وشوية ذكريات من لمة العيلة المنسية
إمبارح حلمت خير اللهم اجعله خير
إنى بضحك وساكن فى قصر كبيييير
وفجأة انكشف الغطا وانكسر بيا السرير
عاوزه أكتب كمان لكن بصراحة زهقت
بنفخ فى قربة مقطوعة لحد ما تعبت
محتاجة حد يفهمنى ويفهم لغة الكبت
………………. ………………
ياترى ممكن ألاقى حد يفهمني ويفهم
لغة الكبت اللى أصبحت سمة من سماتى
فى عالم مادى بحت ؟؟؟؟؟
الله المستعان………..
بقلمي _ صباح غيث
